Книги
Реклама
Александр Андреев. Иван III

Примечание 33


«СКАЗАНИЕ О КНЯЗЬЯХ ВЛАДИМИРСКИХ (написано в конце XV века).

И в то время некий воевода новгородцкий именем Гостомысл оканчивает свое житье и созва вся владелца Новагорода и рече им: «О мужие новгородстии, совет даю вам аз, яко да пошлете в прусскую землю мужа мудры и призовите от тамо сущих родов к себе владелица». Они же шедше в Прусскую землю и обретоша тамо некоего князя именем Рюрика, суща от рода римского Августа царя. И молиша князя Рюрика посланницы от всех новгородцов, дабы шел к ним княжити. Князь же Рюрик прииде в Новгород, имея с собою два брата: единому имя Трувор, а второму Синеус, а третий племянник его именем Олег. И оттоле наречен бысть Великий Новград; и начя князь великий Рюрик первый княжити в нем.

А великого князя Рюрика четвертое колено великий князь Володимер, иже просветил Русскую землю святым крещеньем в лето 6496 (988 год. – А.А.). А от великого князя Владимира четвертое колено князь великий Владимир Всеволодович Мономах, правнук. Егда седе в Киеве на великом княжении, совет начят творити с князми своими, и с боляры, и велможи, тако рек: «Егда аз мал есмь преже мене царствовавших и хоругви правящих скипетра великиа Русиа, яко же князь великий Олег ходил и взял с Цариграда великую дань на вся воа своа и здрав восвояси возвратися; и потом Всеслав Игоревич, князь великий, ходил и взял на Констянтине граде тяжчайшую дань. А мы есмя Божиею милостью настолницы своих прародителей и отца моего великого князя Всеволода Ярославичя и наследницы тоя же части от Бога. Ныне совета ищу от вас, моея полаты князей, и боляр, и воевод, и всего христолюбивого воинства; да превознесется имя святыа живоначальныа Троици вашея храбрости могутством Божьею волею с нашим повелением; и кий ми совет против воздаете?» Отвещаста же великому князю Владимиру Всеволодовичю его князи, и боляре, и воеводы: «Сердце царево в руце Божьи, а мы вси есмо в твоей воле». Князь же великий Владимир собирает воеводы благоискусны и благоразумны и поставляет чиноначальники над различными воинствы – тысящники, сотники, пятдесятники над различными чины боренья; и совокупи многия тысяша воинства, и отпусти их на Фракию Цариграда области; и плениша я доволно, и возвратишася с многим богатеством.

Тогда бе в Цариграде благочестивый царь Константин Манамах и в то время брань имея с персы и с латыною. И составляет совет мудре и царски, отряжает послы к великому князю Владимиру Всеволодичю: Неофита митрополита ефеского и с ним два епископа, милитинска и стратига Антипа антиохийского, игемона иерусалимского Еустафия, и иных своих благородных. От своея же выя снемлет животворящий крест от самого животворящего древа, на нем же распятся владыка Христос. Снемлет же от своея главы венец царский и поставляет его на блюде злате. Повелевает же принести крабьицу сердоликову, из нея же Август, царь римский, веселящеся, и ожерелье, иже на плещу своею ношаше, и чепь от злата аравска исковану, и ины многи дары царския. И предаде их митрополиту Неофиту Неофиту с епископы и своим благородным посланником, и посла их к великому князю Владимиру Всеволодовичу, моля его и глаголя: «Прийми от нас, о боголюбивый благоверный князе, сиа честныа дарове, иже от начатка вечных лет твоего родства и поколенья царский жребий на славу и честь и на венчанье твоего волного и самодерждавного царствиа. И о нем же начнут тя молити наши посланницы, что мы от твоего благородиа просим мира и любви; яко церкви Божиа безмятежна будет, и все православие в покои пребудет под сущею властью нашего царства и твоего волного самодержавства Великиа Русиа; яко да нарицаешися отселе боговенчанный царь, венчан сим царским венцем рукою святейшего митрополита Кир Неофита с епископы». И от того времени князь великий Владимир Всеволодич наречеся Манамах, царь Великиа Русиа. И пребысть потом прочаа времена с царем с Константином в смирении и любви. И оттоле и доныне тем венцем венчаются царским велиции князи володимерстии, его же прислал греческий царь Константин Манамах, егда ставятся на великое княжение русское».



<< Назад   Вперёд>>  
Просмотров: 1769