Книги
Реклама
Александр Андреев. Иван III

Коростынский договор 1471 года Великого Новгорода с великим князем Иваном III Васильевичем о мире


Печатается по изданию: Русские повести XV–XVI веков. М, 1958.



Грамота новгородская.

По благословению нареченного на архиепископство Великого Новгорода и Пскова священноинока Феофила.

Се приехаша к великому князю Иоанну Васильевичу всея Руси и к его сыну великому князю Иоанну Иоанновичу всеа Руси от посадника новогородского Тимофея Остафьевича, и от тысяцкого новгородского Василия Максимовича, от всего Великого Новагорода посадники новогородские, посадник Иван Лукинич, посадник Яков Александрович, посадник Феофилакт Захарьинич, посадник Лука Федорович, посадник Иван Васильевич, а от житьих Лука Остафьевич, Александр Клементьевич, Феодор Иевлич, Окинф Васильевич, Дмитреи Михаилович, и добили челом своеи господе великим князем, и кончали мир по крестным грамотам с великим князем Иоанном Васильевичем и с его сыном великим князем Иоанном Иоанновичем.

1. Как целовал князь велики Андреи, и князь велики Иоанн, и князь велики Семен, и прадед твои князь велики Дмитреи, и дед твои князь велики Василеи, и отец твои князь велики Василеи, целуи, господине князь велики Иван Васильевич и князь велики Иван Иванович, по тому же крест ко всему Великому Новгороду и по сеи грамоте.

2. Новгород, господине, держати вам в старине, по пошлине, без обиды, а нам, мужем новогородцом, княжение ваше держати чесно и грозно, без обиды.

3. А за короля и за великого князя литовского, кто король или великий князь на Литве не буди, от вас, от великих князеи, нам, вашеи отчине Великому Новгороду, мужем волным не отдатися ни которою хитростью, а быти нам от вас, от великих князеи, неотступным ни к кому.

4. А князеи нам у короля великого князя литовского собе на пригороды не просити, ни приимати из Литвы князеи в Великии Новгород.

5. Также нам, Великому Новугороду, отчине вашеи, недругов ваших, великих князеи, князя Ивана Можаиского, и князя иоанна Шемякина, и князя Василья Ярославича и их зятии к собе в Новгород не приимати.

6. А после сего докончания и из Московскои земли из великого княжениа кто лиходеи великих князеи приедет в Великии Новгород, а Новугороду их не примати; или хто лиходеи великих князеи побежит из Московскои земли в Литву или в Немци, а из Литвы или из Немец прибежит в Новгород, и Новугороду их не приимати.

7. А на владычество нам, Великому Новугороду, избирати нам собе по своеи старине; а ставитися нашему владыце в дому Пречистые и у Гроба святого Петра чудотворца на Москве у вас, у великих князеи, и у вашего отца, у митрополита, которыи митрополит у вас, у великих князеи ни будет; а инде нам владыки, опроче московского митрополита, нигде не ставити.

8. А пошлины вам, великим князем, и вашему отцу митрополиту от владыки имати по старине; а лишнего не прибавливати. А на Волоце и на Вологде владжыце церкви и десятина и пошлина своя ведати по старине.

9. А что Юрьевского монастыря земля на Волоце и та земля к Юрьеву монастырю по старине.

10. А пошлин ваших, великих князеи, нам, Великому Новгороду, не таити, по крестному целованью.

11. А что волостеи новогородских всех, вам не держати своими мужи, держати вам мужи новогородскими, и дар имати от тех волостеи.

12. А без посадника вам, великим князем, суда не судити, ни волостеи не раздавати, ни грамот давати.

13. А что вам, великим князем пошлина в Торжку: тиуны свои держати на своеи части, а Новугороду на своеи части.

14. А в Бежичах вам, великим князем, ни вашим княгиням, ни вашим бояром, ни вашим слугам сел не держати, ни купити, ни даром не примати, по всеи волости Новугородскои.

15. А се вы волости новугородскии: Торжок, Бежичи, Городец Палец, Шипина, Мелеча, Егна, Заволочие, Тирг, Пермь, Печера, Югра.

16. А в Русу вам, великим князем, ездити на третью зиму. А лете ездити на Взвад звереи гонити.

17. А в Ладогу вам слати осетренники и медовары по старым грамотам по крестным.

18. А в Ладогу вам, великим князем, ездити на третие лето.

19. А из Бежич вам, великие князи, не выводити, в свою волость, ни из иных волостеи новогородских, ни грамот давати, ни закладнеи не держати, ни приимати ни вашим княгиням, ни вашим бояром, ни купчины.

20. А без вины вам, великие князи, мужа волости не лишати, ни грамот ни посужати.

21. А пожни, великии князи, ваши и ваших мужеи, то ваши и ваших мужеи; а што пожни новогородские, а то к Новугороду, как пошло.

22. А дворяном нашим, как пошло, погон имати: ото князя по пяти кун, а от тиуна по две куны.

23. А что мыт по Суздвльскои земли в вашеи волости: от воза имати по две векши, и от лодьи, и от хмельна короба, и ото лняна.

24. А дворяном вашим у купцов повоза не имати, развее ратные вести.

25. А слобод и сел князеи великие сступилися Великому Новугороду; на Новогородскои земли сел не ставити.

26. А на Имоволожском погосте куны имати.

27. А холоп или роба иметь на господу вадити, тому вам веры не яти.

28. Ни на Низу новогородца не судити, ни дани роздавати, ни приставов вам не всылати во всю волость Новогородскую, с Низу не всылати.

29. Также нам, новогородцем, ваших, великих князеи, торговцев изо всего великого княжения вашего в в Новегороди не судити.

30. а что вам, великие князи, гнев на владыку, и на посадника, и на тысяцкого, и на весь Новгород, то вам, великие князи, нелюбие отложити.

31. А кто почнет вам вадити, тому вам веры не яти.

32. А про послы и про купцы новогородские, тех вам не приимати.

33. А в Немецком дворе торговати нашеи братие новогородцом; а приставов вам не приставливати.

34. А гостем гостити без рубежа, по цесареве грамоте.

35. А судеи слати по волостем на Петров день, как пошло.

36. А вывода межи Суздальскои земли и Новугородскои не чинити.

37. А закладнем вам, великие князи, и вашим княгиням и вашим бояром в Торжку не держати, ни во всеи волости Новугородскои; а купец поедет во сто, а смерд потянет в свои потуг, как пошло, к Новугороду.

38. А на том на всем, господине князь велики Иоанн Васильевич всея Руси, целуите господине, крест ко всему Великому Новгороду, безо всякого извета; также и мы, посадники, и тысяцкие, и весь Великии Новгород, целуем крест ко своеи господе, к великим князем, к великому князю Ивану Васильевичу всея Руси и к великому князю Ивану Ивановичу всея Руси, по любви в правду, безо всякие хитрости.

А писана в лето 79 августа 11.

Грамота московская.

А се другая с того же вместе, а печати и подписи опрочь собе.

А се за то ялися послове Великого Новагорода к великому князю Ивану Васильевичу всея Руси и к его сыну, к великому князю Ивану Ивановичу всея Руси, по новугородскому слову и по новугородской грамоте, на чем послали к великим князем посадника Ивана Лукинича, посадника Феофилата Захарьинича, посадника Луку Федоровича, посадника Ивана Васильевича, а от житьих Луку Остафьевича, Олександра Клементьевича, Федора Иевлевича, Окинфа Васильевича, Дмитрия Михаиловича.

1. Повелехом суд дати на Городище: от великих князеи боярин судьею, а от Великого Новагорода боярин. Судити им князеи великих человека с новогородцом, а судити им как право, по крестному целованью.

2. А оже ся сопрут о какове деле, а не возмогут управити, и коли будет князь великии в Новегороде, или великого князя сын, или великого князя брат, и тому делу тогда учинить на Городище с посадником конец.

3. А что заклад в рядных грамотах, а то имати великиим князем с владыкого на виноватом от сего докончания.

4. А крюк великим князем по старине на третеи год.

5. А от волостей дар имати по старине.

6. А печати быти князеи великих.

7. А виры имати князем великим по старине, а новогородцом не таити.

8. А с новоторжцев и с демонцов князи великие целованье сложили.

9. А что серебро и хлеб великим князем в Торжку или на губах, а то великим князем не надобе.

10. А кто будет на поруце дан в серебре или в хлебе, в с тех порука доловь; а что собрано, а то великим князем, а Новугороду о том на новоторжцев нелюбия не держати, ни мщатися им ни коею хитростью.

11. А что воина была князеи великих над новгородскими волостьми, или новогородская воина была над великих князеи волостьми, тому всему погреб.

12. А после сего крестного целования аже доспеется воина с обе половине, а не ведая сего докончания, иманое назад отдати со обе половине.

13. А учинится мертвои, а почнут клепати мертвыми или грабежом с обе половины, ино суд тому на Городищи перед теми судьями.

14. А суда нам у великих князеи наместникове не отнимати, опроче ратные вести, или коли имут город делати, без хитрости.

15. А вечным грамотам не быти.

16. А в Вотцкую землю слати князем великим ежегод по старине.

17. А коли приведется князем великим взяти чернои бор, и нам черном бор дати по старине.

18. А позов по волостем новогородским позывати позовников великих князеи да новугородским; а в городе позывати князеи великих подвоискои, а новугородцкои подвоискои также.

19. Что наши братья новогородци покупили земли ростовские и белозхерские, или даром поимали, и нам, обыскав тех земель, вам, великим князем, отступитися, по крестному целованью; а кто которые земли запрится, и тому суд и исправа, по крестному целованию.

20. А приедут к нам, к великим князем, от великого Новагорода послы новугородские о каких обидных делах исправы просити, а наедут нас, великих князеи, обою в Рускои земли, ино им посольство правити обема великим князем, и исправы просити у обоих у великих князеи; а им исправа дати Великому Новугороду по крестному целованью, а ответ дати Великому Новгороду. А наедут одиного великого князя в Рускои земли, ино одиному посольство правити; а ему исправа дати Великому Новгороду по тому же крестному целованью, и ответ дати Великому Новугороду.

21. А коих людеи привели к целованью за великих князеи, которыи живут на Новугородскои земли в Торжку, или за Волоком, или инде, где ни есть, и с тех людеи великих князеи целование сложили, а земли и воды к Великому Новугороду по старине и по старым крестным грамотам, и по сеи грамоте; а на тех людеи Великому Новугороду нелюбия не держати, по крестному целованию.

22. А псковским послом ездити к великим князем, также и от великих князеи назад ко Пскову, через Новугородскую землю, путь чист, добровольно; также и новугородским послом ездити через Псковскую землю, где ни есть, путь чист из Новагорода и в Новгород.

23. А учинится татба или разбои в великом княжение новугородцу, ино великим князем обыскати то дело в правду, по крестному целованию. А доспеется великого княжения торговцу в Новугородскои земли татба или розбои, ино то дело Новугороду обыскати в правду, по крестному целованию.

24. А что грамота докончальная в Новегороде ромежь собе о суде, ино у тои грамоты быти имени и печати великих князеи.

25. А что заклад в тои в новугородскои грамоте в докончальнои написан на наездщиков, и на грабежщиков, и на наводщиков, ино князем великим взяти половина, по Новогородскои грамоте, а Великому Новугороду половина.

26. А кто имет посул давати или кто и почнет имати по концем, и по рядом, и по стам, и по улицам у грабежщиков, и у наводщика, и у наездщика, ино взяти на том тои же заклад, великим князем половина, по Новгородскои грамоте, а Великому Новугороду половина.

27. А сотцким и рядовичам безо князеи великих наместника и без посадника не судити нигде.

28. А что у нас, у великих князеи, нятцов и полону, и мы, великии князи, пожаловали свою отчину Великии Новгород, тех есмы нятцов новугородских всех и полон весь велели отпустити.

29. А на всем на том, господине князь велики Иоанн Васильевич всея Руси и князь велики Иван Иванович всея Руси целуите, господине, крест ко всему Великому Новгороду, безо всякого извета; также и мы, посадники, и тысяцкие, и весь Велики Новгород, целуем крест к своеи господе к великим князем, к великому князю Ивану Васильевичу всея Руси и к великому князю Ивану Ивановичу всея Руси, по любви и правду, безо всякие хитрости.

А писана августа 11 в лето 70 девятое.



<< Назад   Вперёд>>  
Просмотров: 2942